BANDA

I.

BANDA

Ordo militaris in Hispania A. C. 1332. ab Alphonso Castellano institutus, cuius ipsemet Rex semper caput. Fasciam gerebant rubram sub brachio sinistro nodô constrictam. Honor non nisi iuvenibus, et quidem iis, qui 10. annos in bello egregie se gessissent, aut in Aula serviissent, concessus. Equites S. Iacobi his successisse videntur Marian l. 16. c. 2.

II.

BANDA

Syriae fluvius.

III.

BANDA

insula, satis nota in mari Indico, sub Hollandorum dominio vicinaeque aliquot insulae, totius orbis terrarum solae sponte lautiores in epulas et medicamenta mortalium, ex una

eademque arbore macim et nucem myristicam fundunt. Arbor ad pyri similitudinem accedit, fructus mala persica quadantenus imitatur: floret quô tempore ibidem aliae quoque plantae, et herbae varii generis: e quibus universis mirificus odor, incomparabilis cuiusdam suavitatis exsistit: ubi defloruit, maturescens pomum paulatim e viridi, tum caeruleas luteasque, tum purpureas et igneas transit in maculas, qualis in arcu caelesti cum voluptate cernitur. Sita est ab Amboina, versus Euronotum, in Archipelago S. Lazari, veniuntque eô nomine parvae sex insulae, ab interlabente Oceano a se invicem distinctae, nempe Lontor, reliquarum maxima, eaque fortalitiô munita: Nera, Poleway, Pooleroon, Rosegain, et Goonongapy, quae omnes imperio Belgarum subsunt. Ex his Pooleroon una fuit e rebus inter eos et Anglos controversis, quâ Angli pace factâ A. C. 1667. demum cesserunt. Auctor Anonymus Hist. Orbis Terr. Georgr. et Civ.